Sesan.com: ដំណាប់ត្នោតទុំ🍞🍣🍟

ផលប្រយោជន៍នៃត្នោតទុំយើងអាចយកវាទៅធ្វើបង្អែម បានដូចជា៖ នំអាកោត្នោត, ចាហួយត្នោត,នំត្នោតបាយដំណើប,នំត្នោតម្សៅ, នំត្នោតចំហុយ។ល។ ខាងក្រោមនេះយើងនឹងទៅមើលពីរបៀបធ្វើដំណាប់ត្នោតទុំមានរស់ជាតិឆ្ងុយឆ្ងាញ់៖

១, ធាតុផ្សំ៖

- ត្នោតទុំចំនួន៥ទៅ១០ផ្លែ

- អំបិលកន្លះស្លាបព្រាបាយ។

៣, របៀបធ្វើ:

យកត្នោតទុំទៅលាងទឹកទាំងសំបកឱ្យបានស្អាតជាមុន រួចយកសំបកចេញទុកតែសាច់ ច្របាច់យកសាច់របស់វា។ យកអំបិលទៅដាក់ក្នុងសាច់ត្នោតទុំ ដែលបានដុសរួចច្របាច់យកសាច់ចេញឱ្យអស់ និងយកសរសៃទៅបោះចោលយកសាច់ត្នោតទៅចាក់ចូលក្នុងឆ្នាំង រួចដាំលើភ្លើងកូររហូតដល់ដាច់ទឹកអស់ដូចធ្វើនំកូរដែរ

ទុកវាឱ្យត្រជាក់ រួចយកទៅដាក់លើស្លឹកចេកកៀរវាឱ្យស្មើស្តើងៗល្មម។ យកដំណាប់ត្នោតនោះទៅដាក់ហាលថ្ងៃឱ្យស្ងួតរួចយកទៅច្រកទុកនៅក្នុងកែវដោយគ្របវាទុកឱ្យជិតជាការស្រេច។ ដំណាប់ត្នោតទុំនោះមានរសជាតិឆ្ងាញ់ ហើយអាចរក្សាទុកបានយូរទៀតផង។

- ក្រៅពីធ្វើអាហារឬបង្អែម ផ្លែត្នោតទុំមានប្រយោជន៍សំខាន់សំរាប់យកមកបំប៉នគោ។ មេគោទើបសំរាលកូនបាន១ថ្ងៃឬ២ថ្ងៃ ត្រូវយកផ្លែត្នោតទុំអោយវាស៊ីដើម្បីបង្កើនកំលាំងនិងសំបូរទឹកដោះ។ បើវាមិនស៊ីទេយើងជាម្ចាស់អាចយកវាច្របាច់យកសាច់ ដាក់ក្នុងបំពង់ឬដបកែវច្រកចូលក្នុងមាត់របស់វាអោយវាលេប។ បើមានច្រើនកាលណាល្អកាលនោះ។

- នៅមានប្រយោជន៍ពិសេសមួយទៀត គឺផ្លែត្នោតទុំ យើងយកវាទៅដាក់ក្រោមដើមដំណាំដែលមានផ្លែ ដើម្បីទាក់ទាញអោយមេអំបៅឬសត្វល្អិតបំផ្លាញដំណាំ វាមករោមលើផ្លែត្នោតទុំហើយផ្លែឈើក្នុងចំការគឺត្រូវបានរួចផុតពីសត្វបំផ្លាញ។ អ្នកខ្លះគេយកផ្លែត្នោតជ្រលក់ថ្នាំពុលដាក់ក្រោមដើមដំណាំឬបន្លែយកផ្លែ ដើម្បីសម្លាប់សត្វមេអំបៅនិងសត្វល្អិត៕