ការនាំចេញអង្ករទៅក្រៅប្រទេសមានការកើនឡើងក្នុងរយៈពេល៥ខែឆ្នាំ២០២០

ក្នុងរយៈពេល៥ខែដើមឆ្នាំ២០២០នេះ កម្ពុជាបាននាំចេញអង្ករទៅកាន់ទីផ្សារបរទេសមានការកើនឡើងជាង៤០ភាគរយបើធៀបនឹងរយៈពេលដូចគ្នាក្នុងឆ្នាំ២០១៩។ នេះបើតាមការឱ្យដឹងរបស់រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន។

លោកបានឱ្យដឹងថា លទ្ធផលនៃការនាំចេញអង្ករដែលបានឆ្លងកាត់ការត្រួតពិនិត្យភូតគាមអនាម័យក្នុងរយៈពេល៥ខែដើមឆ្នាំ២០២០នេះសម្រេចបាន៣៥៦,០៩៧តោនកើនឡើងប្រមាណ១០៥,៩២៥តោនឬស្មើនឹង៤២,៣៤ភាគរយដែលធៀបទៅនឹងរយៈ៥ខែដើមឆ្នាំ២០១៩ដែលមានចំនួន២៥០,១៧២តោន។

ដោយឡែកសម្រាប់ខែឧសភាឆ្នាំ២០២០នេះសម្រេចការនាំចេញអង្ករបានចំនួន៥៥,៨៤៥តោនកើនឡើងចំនួន១៩,៤៣៦តោនស្មើនឹង៥៣,៣០ភាគរយធៀបទៅនឹងខែឧសភាឆ្នាំ២០១៩ដែលក្នុងនេះមានអង្ករក្រអូបគ្រប់ប្រភេទចំនួន៥១,៦៨៣តោន, អង្ករចម្រុះគ្រប់ប្រភេទចំនួន៣,៥៧៨តោន និងអង្ករចំហ៊ុយមានចំនួន៥៨៤តោន។

លោក វេង សាខុន បានលើកឡើងបន្ថែមថា ប្រទេសដែលបានបញ្ជាទិញអង្ករពីកម្ពុជាក្នុងរយៈពេល៥ខែមកនេះមានចំនួន៥៤ប្រទេសដែលប្រទេសក្នុងសហភាពអ៊ឺរ៉ុបមានចំនួន២៤ប្រទេសក្នុងចំណោម២៨ប្រទេស, ប្រទេសចិន, ប្រទេសសមាជិកអាស៊ានចំនួន៦ប្រទេស ហើយនិងទ្វីបដទៃទៀតចំនួន២៣ប្រទេស។ ទន្ទឹមនឹងនេះក៏មានក្រុមហ៊ុនចំនួន៥ក្នុងចំណោម ៤៩ក្រុមហ៊ុន ដែលបាននាំចេញអង្ករច្រើនជាងគេ។

ការនាំចេញអង្ករកម្ពុជាក្នុងរយៈពេល៥ខែដើមឆ្នាំដូចគ្នាប្រៀបធៀបទៅនឹងឆ្នាំ២០១៩ មានកំណើននៅគ្រប់គោលដៅនាំចេញទាំងអស់ដូចជា សហភាពអ៊ឺរ៉ុបកើនចំនួន៥១,១០ភាគរយ, ប្រទេសចិនកើនចំនួន២៥,២៦ភាគរយ, បណ្តាប្រទេសសមាជិកអាស៊ានកើនចំនួន៤៥,៣៩ភាគរយ និងគោលដៅដទៃទៀតបានកើនឡើងចំនួន៧៩,៤០ភាគរយ៕

ប្រភព៖ ផ្កាឈូក(  By មុំ គន្ធា - June 1, 2020)

ផ្សាយបន្តដោយ៖ Sesan